ລັດຖະບານຊີ້ແຈ້ງ-ຕອບຂໍ້ຊັກຖາມຂອງ ສສຊ

ກອງ​ປະຊຸມ​ສະໄໝ​ສາມັນ​ເທື່ອທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 23 ຕຸລາ 2017 ຢູ່ທີ່​ຫ້ອງ​ວ່າການ​ສູນ​ກາງ​ພັກ ໂດຍເປັນ​ປະທານ​ຂອງ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ມີ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ພ້ອມ​ດ້ວຍ​ບັນດາລັດຖະມົນຕີ ສະມາຊິກ​ສະພາແຫ່ງ​ຊາດ (​ສສຊ) ເຂົ້າ​ຮ່ວມ.

ການ​ດຳເນີນ​ກອງ​ປະຊຸມ​ໃນພາກ​ເຊົ້າ ບັນດາ​ລັດຖະມົນຕີ​ໄດ້ຜັດປ່ຽນ​ກັນ​ຂຶ້ນ​ຊີ້​ແຈງຂໍ້​ຊັກ​ຖາມຂອງ ​ສສຊ ໂດຍ​ເລີ່ມ​ຈາກ​ທ່ານນາງ ວັດທະນາ ດາລາ​ລອຍ ຮອງ​ຜູ້​ວ່າການ​ທະນາຄານ​ແຫ່ງ ​ສປປ ລາວ ຕາມ​ມາ​ດ້ວຍ​ກະຊວງ​ພະລັງງານ ແລະ ບໍ່​ແຮ່ ໂດຍ​ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່ ຫຼັງ​ຈາກ​​​ນັ້ນ ​ທ່ານ ຄຳ​ແພງ ໄຊ​ສົມ​ແພງ ລັດ​ຖະ​ມົນຕີ ກະຊວງ​ແຮງ​ງານ ແລະ ສະຫວັດ​ດີ​ການ-ສັງຄົມ ໄດ້​ຂຶ້ນ​ຊີ້​ແຈງຕໍ່​ຄຳ​ຖາມ​ເຈາະ​ຈິ້ມ​ຕໍ່​ກັບ​ການ​ປົກປ້ອງ​ສິດ ແລະ ຜົນ​ປະໂຫຍດ​ອັນຊອບ​ທຳຂອງ​ແຮງ​ງານ​ລາວ​ຢູ່ພາຍ​ໃນ ຕ່າງປະເທດ ແລະ ແຮງງານ​ຕ່າງປະເທດຢູ່ ​ສປປ ລາວ ໂດຍ​ທ່ານ​ໄດ້​ຍົກ​ໃຫ້​ເຫັນ​ທາງດ້ານ​ນິຕິ​ກຳ​ກ່ຽວ​ກັບ​ການ​ຄຸ້ມຄອງ ແລະ ກົນ​ໄກ​ການ​ຄຸ້ມ​ຄອງແຮງ​ງານ ໃນ 9 ເດືອນ​ຕົ້ນ​ປີ 2017 ຜ່ານ​ມາ ສາມາດ​ລົງ​ຕິດຕາມ​ກວດກາ ຫົວໜ່ວຍ​ແຮງ​ງານທົ່ວ​ປະເທດ​ໄດ້​ທັງ​ໝົດ 2.778 ຫົວໜ່ວຍ ລວມ​ມີແຮງ​ງານ​ລາວ ແລະ ແຮງ​ງານ​ຕ່າງປະເທດ 47.162 ຄົນ ຍິງ 16.831 ຄົນ ເງິນເດືອນ​ສະເລ່ຍ ຫຼື ຄ່າ​ແຮງງານ​ຂອງ​ຜູ້​ອອກແຮງ​ງານ​ຂະແໜງ​ກະສິກຳ 1 ລ້ານ​ກວ່າ​ກີບ​ຕໍ່ຄົນ​ຕໍ່​ເດືອນ ຂະແໜງ​ອຸດ​ສາຫະ​ກຳ 1,2 ລ້ານ​ກີບ​ຕໍ່​ຄົນ​ຕໍ່ເດືອນ ຂະແໜງ​ບໍລິຫານ 2,5 ລ້ານ​ກວ່າ​ກີບ​ຕໍ່​ຄົນ​ຕໍ່​ເດືອນ ຈາກນັ້ນ ທ່ານ​ນາງ ວຽງ​ທອງ ສີ​ພັນດອນ ປະທານ​ອົງການ​ກວດ​ສອບແຫ່ງ​ລັດ ກໍ່​ໄດ້​ຂຶ້ນ​ຊີ້​ແຈງ​ຕໍ່​ຂໍ້​ຊັກຖາມ ປິດ​ທ້າຍ​ໃນ​ພາກ​ເຊົ້າ​ດ້ວຍ ທ່ານ ບຸນ​ທອງ ຈິດ​ມະນີ ປະທານອົງການ​ກວດກາ​ລັດຖະບານ.

ບັນຍາກາດ​ຂອງ​ການ​ດຳເນີນກອງ​ປະຊຸມ​ພາກ​ບ່າຍ​ຍິ່ງ​ມີຄວາມ​ເຂັ້ມ​ຂຸ້ນ​ຂຶ້ນ​ກວ່າ​ເກົ່າ ໂດຍທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ຂຶ້ນ​ຊີ້​ແຈງ​ຕໍ່​ຂໍ້​ຊັກຖາມ ເຊິ່ງ​ມີ​ຫຼາຍ​ບັນຫາ​ທີ່​ໜ້າສົນໃຈ ໂດຍ​ສະເພາະ ຂັ້ນ​ຕອນໃນ​ການ​ອະນຸຍາດ​ດຳເນີນ​ທຸລະກິດ​ໃນ ​ສປປ ລາວ ເຫັນ​ວ່າມີຄວາມ​ຫຍຸ້ງຍາກ​ສັບສົນ​ຫຼາຍ​ຂັ້ນຕອນ ເມື່ອ​ສົມ​ທຽບໃສ່​ບັນດາ​ປະເທດ​ໃນ​ພາກ​ພື້ນ ເຊິ່ງ​ແກ່ຍາວ​ເວລາ​ເຖິງ 60-70 ວັນ ຈາກ​ສະພາບ​ຕົວ​ຈິງ​ໃນ​ການ​ປະຕິບັດ ເຫັນ​ວ່າມີ​ຫຼາຍ​ບັນຫາ​ທີ່​ຈະ​ຕ້ອງໄດ້​ຮັບ​ການ​ປັບປຸງ​ແກ້​ໄຂ​ຮີບ​ດ່ວນ ລວມ​ໄປ​ເຖິງ​ການ​ຄຸ້ມ​ຄອງ​ບັນຫາທີ່​ດິນ ໂດຍ​ສະເພາະແມ່ນ​ການຫັນ​ຊັບ​ສິນ​ທີ່​ດິນ​ເປັນ​ທຶນ ມີ​ຫຼາຍບັນຫາ​ທີ່​ພົບ​ເຫັນ ໂດຍ​ສະເພາະ ບັນຫາ​ການ​ແບ່ງ​ຂັ້ນ​ຄຸ້ມ​ຄອງຄວນ​ມີ​ການ​ແບ່ງ​ຂັ້ນ​ຄຸ້ມ​ຄອງ​ລະອຽດ​ກວ່າ​ເກົ່າ ນອກ​ນີ້ ບັນຫາໂຄງການ​ພັດທະນາ​ພື້ນຖານ​ໂຄງລ່າງ ເປັນຕົ້ນ: ຖະໜົນ​ຫົນທາງ ພົບ​ກັບ​ບັນຫາ​ຄຸນະພາບ​ຕ່ຳ ແລະ ເກີດ​ການ​ຢືມ​ເງິນ​ສາມ​ແຈ ເຊັ່ນ: ລັດຖະບານ​ຕິດ​ໜີ້​ຜູ້​ປະກອບ​ການ ຜູ້​ປະກອບ​ການ​ຕິດ​ໜີ້ທະນາຄານ ສະເພາະ​ບັນຫາ​ໂຄຕ້າ​ພະນັກງານ-ລັດຖະກອນ 3.000 ຄົນ ຈະ​ຕ້ອງ​ມີ​ການ​ແບ່ງສ່ວນ​ທີ່​ເໝາະ​ສົມ ໂດຍ​ຈະ​ເນັ້ນໃສ່​ຄູ ແພດ​ໝໍ ທີ່ຢູ່​ຫ່າງ​ໄກ​ສອກຫຼີກ ຮອງ​ລົງ​ມາ​ຈະ​ແມ່ນ​ສຳນັກງານ ອົງການ​ທ້ອງຖິ່ນ ທີ່​ເຫັນວ່າ​ມີ​ຄວາມ​ຈຳເປັນ.

ຈາກ​ນັ້ນ ບັນດາ ​ສສຊ ຫຼາຍເຂດ​ໄດ້​ຜັດປ່ຽນ​ກັນ​ຂຶ້ນ​ຊັກ​ຖາມເພີ່ມ​ຕື່ມ ກ່ຽວ​ກັບ​ຫຼາຍ​ບັນຫາທີ່ເຫັນ​ວ່າ​ລັດຖະບານ​ຈະ​ຕ້ອງ​ໄດ້ເອົາໃຈໃສ່ ເຊັ່ນ: ບັນຫາ​ໂຄງການ​ລະດັບ​ແຂວງ​ເປັນ​ຜູ້​ອະນຸມັດ ການ​ນຳ​ໃຊ້​ຊັບພະຍາກອນ​ທຳ​ມະຊາດ ແລະ ອີກ​ຫຼາຍ​ບັນຫາ​ທີ່​ບໍ່ທັນ​ສອດຄ່ອງ​ກັບ​ລະບຽບ​ກົດໝາຍ ຕໍ່​ບັນຫາ​ຂໍ້​ຊັກ​ຖາມ ຫຼາຍບັນຫາ​ທີ່​ທາງ ​ສສຊ ໃຫ້​ຄວາມສົນໃຈ​ນັ້ນ ທ່ານ​ນາຍົກ​ກໍ່​ໄດ້​ຕອບຄຳ​ຊັກ​ຖາມ​ຢ່າງ​ກົງ​ໄປ​ກົງ​ມາ ເພື່ອ​ນຳ​ສູ່​ການ​ແກ້​ໄຂ​ບັນຫາ​ດ້ວຍ 3 ເປີດ: ເປີດ​ປະຕູ ເປີດ​ສິ່ງ​ກີດຂວາງ ແລະ ເປີດ​ໃຈ ເຮັດ​ໃຫ້ການ​ດຳເນີນ​ກອງ​ປະຊຸມ​ເຕັມ​ໄປດ້ວຍ​ບັນຍາກາດ​ຟົດຟື້ນ ແລະ ມີຄວາມ​ໝາຍ ເປັນ​ທີ່​ເພິ່ງ​ພໍໃຈ​ໃຫ້ແກ່ ​ສສຊ ເພື່ອ​ນຳ​ເອົາ​ເນື້ອ​ໃນຈິດໃຈ​ດັ່ງກ່າວ ​ໄປ​ສືບຕໍ່​ຈັດ​​ຕັ້ງ​ຜັນຂະຫຍາຍ ຮັກສາ​ໄດ້​ສິດ​ຜົນ​ປະໂຫຍດ​ອັນ​ຊອບ​ທຳ​ຂອງ​ປວງ​ຊົນລາວ​ໃນ​ທົ່ວ​ປະເທດ.

-----------------------------------
ລາວຮ໋ອດຮິດ See New. Hear New. Feel New.