ປີທ່ອງທ່ຽວລາວ ຈັດໃຫ້ມີ 18 ກິດຈະກຳ ຢູ່ບັນດາແຂວງທົ່ວປະເທດ

ເພື່ອ​ດຶງ​ດູດ​ນັກ​ທ່ອງ​ທ່ຽວ​ຕ່າງປະເທດ​ເຂົ້າ​ມາ​ທ່ຽວ​ຊົມ ​ສປປ ລາວ ນັບ​ມື້​ຫຼາຍ​ຂຶ້ນ ໃນ​ໂອກາດເປີດ​ປີ​ທ່ອງ​ທ່ຽວ​ລາວ ພັກ-ລັດຖະ​ບານ​ ໄດ້​ຈັດ​ໃຫ້​ມີ​ຫຼາຍ​ກິດ​ຈະກຳ ລວມ​ມີ​ກິດຈະກຳ​ທັງ​ພາຍ​ໃນ ແລະ ຕ່າງປະເທດ ນອກຈາກ​ແນໃສ່​ບັນດາ​ກິດຈະກຳ​ໃນ​ການ​ສົ່ງເສີມ​ບຸນ​ປະເພນີ ແລະ ເທສະການ​ຕ່າງໆ​ຂອງ​ບັນດາ​ແຂວງ​ໃນຂອບ​ເຂດ​ທົ່ວ​ປະເທດ ເປັນ​ການໂຄສະນາ​ເຜີຍແຜ່​ວັດທະນະທຳອັນ​ດີງາມ ປະຫວັດສາດ​ອັນ​ເປັນມູນເຊື້ອ​ຂອງ​ລາວ ແລະ ຄວາມ​ອຸດົມ​ສົມບູນ​ຮັ່ງມີ​ທາງ​ດ້ານ​ທຳ​ມະຊາດ​ທີ່​ສວຍ​ງາມ​ຂອງ​ປະເທດລາວ​ເຮົາ​ແລ້ວ ຍັງ​ມີ​ການ​ໂຄສະນາ​ບຸນ​ປະເພນີ​ຕ່າງໆ ທີ່​ບັນດາແຂວງ​ໄດ້​ຈັດ​ຂຶ້ນ​ພາຍ​ໃນປີ 2018 ແລະ ໂຄສະນາ​ບັນດາແຫຼ່ງ​ທ່ອງ​ທ່ຽວ​ທີ່​ໂດດ​ເດັ່ນ​ຂອງແຕ່​ລະ​ແຂວງ​ອີກ​ດ້ວຍ.

ສຳລັບ​ກິດຈະກຳ​ສະເຫຼີມ​ສະຫຼອງ​ປີ​ທ່ອງ​ທ່ຽວ​ປະກອບ​ມີ: ກິດຈະ​ກຳ​ສະເຫຼີມສະຫຼອງ​ປີ​ທ່ອງທ່ຽວ​ຢູ່​ໃນ​ບັນດາ​ແຂວງ​ມີ​ທັງ​ໝົດ 18 ກິດຈະກຳ ເຊັ່ນ: ບຸນປີໃໝ່​ຊົນເຜົ່າ​ກຶມ​ມຸ ແຂວງ​ອຸດົມ​ໄຊງານ ບຸນ​ເສົາ​ຫຼັກ​ເມືອງ 10 ຊົນເຜົ່າ ແຂວງ​ເຊ​ກອງ ບຸນ​ພະ​ບາດ​ໂພນສັນ ແຂວງ​ບໍ​ລິ​ຄຳ​ໄຊ ບຸນ​ຊົນເຜົ່າ ແຂວງ​ຫຼວງ​ນ້ຳ​ທາ ງານ​ເທສະການ​ດອກ​ງີ້ວ​ບານ ແຂວງ​ບໍ່​ແກ້ວ ບຸນ​ຊ້າງ ແຂວງ​ໄຊ​ຍະ​ບູ​ລີ ບຸນ​ວັດພູ ແຂວງ​ຈຳປາ​ສັກ ບຸນ​ພະທາດສີ​ໂຄດ ແຂວງ​ຄຳ​ມ່ວນ ບຸນປີໃໝ່ລາວ ແຂວງ​ຫຼວງ​ພະ​ບາງ ງານສະເຫຼີມສະຫຼອງ​ແກ້ວ​ຫຼັກ​ເມືອງ ແລະ ທ່ຽວ​ຊົມ​ຖ້ຳ​ທ່ານ​ຜູ້ນຳ ແຂວງ​ຫົວພັນ ງານ​ບຸນຊ່ວງເຮືອ ແຂວງ​ສາລະ​ວັນ ບຸນ​ນະ​ມັດ​ສະການ​ພະ​ທາດຫຼວງ ນະຄອນຫຼວງວຽງ​ຈັນ ບຸນຊ່ວງເຮືອ​ເມືອງ​ຂວາ ແຂວງ​ຜົ້ງ​ສາລີ ບຸນ​ພະທາດອີ່​ຮັງ ແຂວງ​ສະຫວັນ​ນະ​ເຂດ ບຸນ​ກິນຈຽງ ແຂວງ​ຊຽງ​ຂວາງ ບຸນ​ກິນຈຽງ (ຫຼັກ 52) ແຂວງ​ວຽງ​ຈັນ ບຸນ​ກິນ​ຈຽງ ແຂວງ​ໄຊ​ສົມບູນ ແລະ ງານ​ນະມັດສະການ​ພະເຈົ້າ​ໄຊ​ເຊດ​ຖາ ແຂວງ​ອັດ​ຕະ​ປື.

ການເຄື່ອນໄຫວ ແລະ ກິດ​ຈະກຳ​ປິ່ນ​ອ້ອມ​ຢູ່​ພາຍ​ໃນ​ປະກອບມີ: ການ​ຈັດ​ຂະ​ບວນ​ຄາ​ລາ​ວານລົດ​ທ່ອງ​ທ່ຽວ ​ຕາມ​ເສັ້ນທາງ​ແຫຼ່ງທ່ອງ​ທ່ຽວ​ຂອງ​ບາງ​ແຂວງ​ພາກເໜືອ ແລະ ພາກ​ໃຕ້ ການ​ຈັດລາຍການ​ຢ້ຽມຢາມ​ແຫຼ່ງ​ທ່ອງທ່ຽວ​ສຳລັບ​ສື່​ມວນ​ຊົນ ແລະ ບໍ​ລິສັດ​ທ່ອງ​ທ່ຽວ​ພາຍ​ໃນ ແລະ ຕ່າງປະເທດ ເພື່ອ​ໂຄສະນາ​ຜະລິດ​ຕະພັນ ແລະ ແຫຼ່ງ​ທ່ອງ​ທ່ຽວ​ອັນໂດດ​ເດັ່ນ​ຂອງ ​ສປປ ລາວ ໂດຍສະເພາະແມ່ນ​ແຫຼ່ງ​ທ່ອງ​ທ່ຽວປະຫວັດສາດ ວັດທະນະທຳ ແລະ ທຳ​ມະ​ຊາດ ກິດຈະກຳ​ສະເຫຼີມສະຫຼອງ​ວັນ​ທ່ອງ​ທ່ຽວ​ໂລກ ບຸນມະໂຫລານ​ສິລະ​ປະການ​ສະແດງ​ພື້ນເມືອງ​ບັນດາເຜົ່າ ທົ່ວ​ປະເທດ ​ໃນ​ງານ​ບຸນ​ນະມັດສະການພະ​ທາດຫຼວງ.

ກິດຈະກຳ​ປິ່ນ​ອ້ອມ​ຢູ່​ພາຍ​ໃນທີ່​ໄດ້​ສະເໜີ​ເຂົ້າ​ເພີ່ມ ມີ​ຄື: ພິທີໃສ່​ບາດ​ໃຫຍ່ ການ​ເຕັ້ນລຳວົງ ແລະ ເຕັ້ນ​ບັດ​ສະຫຼົບ ລາຍການທ່ອງ​ທ່ຽວ​ຂີ່​ລົດຖີບ​ອາ​ຊຽນ ການແຂ່ງຂັນ​ລົດຈັກ​ວີ​ບາກ ການ​ແຂ່ງລົດ​ໃຫຍ່​ວີ​ບາກ ກິດຈະກຳ​ປີນໜ້າຜາ ແລະ ກິດຈະກຳ​ອື່ນໆ.

ສ່ວນ​ລາຍ​ການເຄື່ອນໄຫວ ແລະ ກິດຈະກຳ​ປິ່ນ​ອ້ອມ​ຢູ່​ຕ່າງປະເທດ ປະກອບ​ມີ: ຈັດ​ງານ​ວັນ​ລາວ ໃນງານ ATF 2018 ຢູ່​ຊຽງ​ໃໝ່ ປະເທດ​ໄທ ຈັດ​ງານ Cocktail ຢູ່ ITB Berlin 2018 ປະເທດ​ເຢຍລະ​ມັນ ງານ​ວາງສະແດງ​ທ່ອງທ່ຽວ​ສາກົນ SMT ຢູ່​ປາ​ຣີ ປະເທດ​ຝຣັ່ງ ຈັດ​ງານ​ວັນ​ລາວ ທີ່ງານ Lao Festival ທີ່​ໂຕ​ກຽວ ປະເທດ​ຍີ່ປຸ່ນ ຈັດ​ງານ​ວັນ​ລາວ ໃນ​ງານ ITE HCM ຢູ່​ປະເທດຫວຽດນາມ ແລະ ງານ​ວາງ​ສະແດງ​ທ່ອງ​ທ່ຽວ​ສາກົນ WTM ຢູ່​ດອນ​ລອນ ປະເທດ​ອັງກິດ.

-----------------------------------
ລາວຮ໋ອດຮິດ See New. Hear New. Feel New.