ປິດຕຳນານ "ຊານ ແມນສັນ" ຂ້າໂຫດ 7 ສົບ (ກົດອ່ານປະຫວັດຂອງ ຊານ ແມນສັນ)

ຫຼັງ​ໃຊ້​ຊີວິດ​ໃນ​ຄຸກ​ມາຫຼາຍກວ່າ​ 40 ປີ​ ຊານ​ ແມນ​ສັນ​ ເຈົ້າ​ລັດ​ທິ​ສັງ​ຫານ​ໂຫດ​ທີ່​ມີຊື່ສຽງ​ທີ່ສຸດ​ໃນ​ຊ່ວງ​ປາຍຊຸມປີ 1960​ ເສຍຊີວິດ​ລົງ​ແລ້ວ​ໃນໄວ​ 83 ປີ.​

ລາຍ​ງານ​ຈາກກົມ​ລາຊະທັນ​ແຄ​ລິ​ຟໍ​ເນຍລະ​ບຸ​ວ່າ​ ຊານ​ ແມນ​ສັນ​ (Charles Manson) ເສຍຊີວິດ​ຕາມທຳມະຊາດ​ ເມື່ອ​ວັນ​ອາທິດ​ທີ່​ຜ່ານມາ​ (19 ພະຈິກ 2017) ປິດ​ຕຳ​ນານລັດ​ທິ​ສະຫຍອງ​ຂວັນ​ອັນ​ມີຊື່ສຽງ​ໃນໄວ​ 83 ປີ.​

ແມນ​ສັນ​ເປັນ​ເຈົ້າ​ຂອງ​ຄວາມ​ຄິດ​ເບື້ອງ​ຫຼັງ​ການຄາຕະກຳຢ່າງ​ໂຫດ​ຫ້ຽມ​ໃນ​ເດືອນ​ສິງ​ຫາ​​ ປີ​ 1969 ເຖິງແມ່ນ​ບໍ່​ເຄີຍ​ລົງ​ມື​ເອງ​ ແຕ່​ຜູ້​ຕິດ​ຕາມ​ແມນສັນ​ທີ່​ເອີ້ນວ່າ​ເປັນ​ "ຄອບຄົວ​ແມນ​ສັນ​" (Manson Family) ໄດ້​ພາກ​ຊີວິດ​ໄປ​ທັງ​ໝົດ​ 7 ສົບ​. ໜຶ່ງ​ໃນ​ນັ້ນ​ແມ່ນພັນລະຍາ​ທີ່​ກຳລັງຖືພາ​ຂອງ​ຜູ້​ກຳ​ກັບ​ຊື່​ດັງ​ ໂຣ​ມັນ​ ໂປ​ລັນ​ສະ​ກີ້​ (Roman Polanski).

ຈາກ​ຊີວິດໄວ​ເດັກ​ທີ່​ບໍ່​ມີ​ໃຜ​ຕ້ອງ​ການ​ໃນ​ອິນ​ເດຍ​ນາ​, ແມນ​ສັນ​ເຄີຍ​ຖືກ​ແມ່​ແທ້​ໆຂາຍຕົນເອງ ​ເພື່ອ​ແລກ​ກັບ​ເບຍ​​ບໍ່​ພໍເທົ່າໃດແກ້ວ.​ ແຕ່​ລຸງ​ຂອງແມນສັນ​ໄ​ປຮັບ​ກັບ​ມາ​ໃນ​ພາຍ​ຫຼັງ​, ທັງ​ຍັງ​ເຄີຍ​ຖືກ​ສົ່ງ​ໄປ​ສະຖານ​ລ້ຽງ​ເດັກ​ກຳ​ພ້າ​ ແລະ​ໃຊ້​ຊ່ວງ​ເວລາໄວ​ໜຸ່ມ​ເຂົ້າ​ໆ​ ອອກ​ໆ ຄຸກ​ຈາກ​ການ​ກໍ່​ອາຊະຍາກຳຢູ່​ສະເໝີ​ ໂດຍ​ມີ​ບັນ​ທຶ​ກວ່າ ​ແມນສັນ​ມີ​ອາການ​ທາງ​ຈິດ.​ 

ຈົນກະທັ້ງ​ປີ​ 1967 ເມື່ອ​ແມນ​ສັນ​ພົ້ນ​ໂທດ​ ກໍ​​ບອກ​ຜູ້​ຄຸມ​ວ່າ​ ບໍ່​ອາດ​ອອກ​ໄປ​ຂ້າງ​ນອກ​ໄດ້​ອີກ​ແລ້ວ.​ ແນວໃດ​ກໍ​ຕາມ​ ແມນສັນ​ກໍ​ໄດ້ຮັບ​ອິດສະຫຼະ​ ແລະ ຍ້າຍ​ໄປ​ຢູ່​ຊານ​ຟ​ຣານ​ຊິສ​ໂກ.​

ໃນ​ຊ່ວງ​ປີ​ 1967-1968 ທີ່ກ​ະ​ແສ​ຮິບ​ປີ້​ຮຸ່ງ​ເຮືອງ​, ແມນ​ສັນ​ເຊິ່ງ​ມີ​ຄວາມ​ສາມາດ​ດ້ານ​ດົນຕີ​ໄດ້​ພົວພັນກັບ​ຄົນ​ໃນ​ວົງ​ການ​ເພງ​ເຊັ່ນ​ວົງ​ The Beach Boys. ແມນສັນ ​ແລະ ​ເພື່ອນ​ຕັ້ງ​ກຸ່ມ​ໃຊ້​ຢາ​ເສບ​ຕິດ​ ແລະ​ເລີ່ມ​ມີ​ຜູ້​ຕິດ​ຕາມ​ທີ່ມັກ ​ແລະ ເຫັນ​ແມນສັນວ່າ​ເປັນ​ຜູ້​ນຳ​ທາງ​ຈິດ​ວິນ​ຍານ​ ດ້ວຍ​ການ​ເວົ້າ​ເຖິງ​ພະ​ເຈົ້າ,​ ຜີສາດ,​ ສົງຄາມ ​ແລະ​ ວັນ​ສິ້ນ​ໂລກ.​ ກະ​ທັ້ງ​ສາມາດ​ຂ້າຄົ​ນ​ໄດ້​ຕາມ​ຄຳ​ສັ່ງ​ຂອງແມນສັນ.​

ເລີ່ມ​ຕຳ​ນານ​ສັງ​ຫານ​ໂຫດ​

ການຄາຕະກຳຄັ້ງທຳອິດ​ເກີດ​ຂຶ້ນ​ໃນ​ເດືອນ​ກໍລະກົດ​ປີ​ 1969 ພຽງ​ສົບ​ດຽວ.​ ແຕ່​ເດືອນ​ຕໍ່​ມາ​ການ​ສັງ​ຫານ​ໂຫດ​ກໍ​ເລີ່ມ​ຂຶ້ນ​ທີ່​ເຮືອນ​ຂອງ​ ໂຣ​ມັນ​ ໂປ​ລັນ​ສະ​ກີ້​ ທີ່​ໄປ​ຕ່າງ​ປະເທດ​ໃນ​ຊ່ວງ​ນັ້ນ​ ໂດຍ​ກຸ່ມ​ສາວົກ​ຂອງ​ແມນ​ສັນ​ໄດ້​ເຂົ້າໄປຄາຕະກຳ ຊາຣອນ​ ເທດ​ (Sharon Tate) ນັກ​ສະແດງ​ສາວ​ຜູ້​ເປັນ​ພັນລະຍາ​ທີ່ກຳລັງຖືພາ​ 8 ເດືອນ​ດ້ວຍ​ການ​ແທງ​ 16 ຄັ້ງ​ ແລະ ຍັງ​ຂ້າ​ເພື່ອນ​ຂອງ​ນາງ​ອີກ​ 3 ຄົນ​ຢ່າງ​ໂຫດ​ຫ້ຽມ​ ກ່ອນ​ຈະ​ໜີ​ໄປ.​ 

ແລງມື້​ຕໍ່​ມາ​ ກຸ່ມ​ສາວົກ​ຂອງ​ແມນ​ສັນ​ລົງ​ມື​ອີກ​ຄັ້ງ​ ດ້ວຍ​ການ​ບຸກ​ເຂົ້າໄປ​ໃນ​ເຮືອນ ​ແລະ ​ຂ້າ​ຜົວເມຍ​ອີກ​ຄູ່​ໜຶ່ງ​ ລວມ​ທັງ​ສອງ​ຄືນ​ 7 ສົບ​ ມີ​ບາດແຜ​ຖືກ​ແທງ​ທັງໝົດ​ 169 ຄັ້ງ​ ແລະ ​ຖືກ​ຍິງ​ອີກ​ 7 ຄັ້ງ.​ ມີ​ການ​ຂຽນ​ຄຳ​ວ່າ​ pig ເທິງ​ກຳ​ແພງ ​ແລະ ​ປະຕູ​ເຮືອນ​ ແລະ​ ໃຊ້​ເລືອດ​ຂຽນ​ຄຳ​ວ່າ​ Helter Skelter ເຊິ່ງ​ເປັນ​ເພງ​ຂອງ​ The Beatles ທີ່​ແມນ​ສັນ​ມັກ​. ພາຍ​ຫຼັງ​ຜູ້ລົ​ງ​ມື​ໃຫ້​ການ​ວ່າ ​ເພາະ​ແມນ​ສັນ​ຕ້ອງ​ການ​ກໍ່​ສົງຄາມ​ສີ​ຜິວ​ ຈຶ່ງ​ສ້າງ​ຫຼັກ​ຖານ​ປ້າຍ​ຄວາມ​ຜິດ​ໃຫ້​ກັບ​ກຸ່ມ​ Black Panthers.

ແມນ​ສັນ ​ແລະ ​ຜູ້​ຕິດ​ຕາມ​ຖືກ​ຈັບ​ໃນ​ເດືອນ​ຕຸລາ​ ປີ​ 1969 ຈາກ​ຂໍ້​ຫາ​ລັກ​ຊັບ​ ກ່ອນ​ທີ່​ໃນ​ກຸ່ມ​ຈະໃຫ້​ການ​ເຊື່ອມ​ໂຍງ​ມາ​ເຖິງ​ຕົວ​ແມນ​ສັນ​ໃນ​ຖານະ​ຜູ້​ນຳ.​ ແຕ່ເຖິງ​ແມ່ນ​ວ່າໃນ​ຂະນະ​ສອບສວນ​ຄວາມ​ຜິດ,​ ຄອບຄົວ​ແມນ​ສັນ​ກໍຍັງ​ຫົວ,​ ຮ້ອງ​ເພງ​ ໄປ​ຈົນ​ເຖິງ​ສະຫຼັກ​ເຄື່ອງ​ໝາຍ​ X ລົງ​ເທິງ​ໜ້າ​ຜາກ​ໃຫ້​ກັນ​. ນອກ​ຈາກ​ນີ້​ Atkins ໜຶ່ງ​ໃນ​ສາວົກ​ຍິງ​ຂອງແມນສັນ​ ຍັງ​ເຄີຍ​ກ່າວ​ກັບ​ເພື່ອນ​ນັກ​ໂທດ​ວ່າ​ ນາງ​ລົງ​ມື​ຂ້າ​ ຊາຣ​ອນ​ ເທດ​ ແລະ ​ເພື່ອນ​ເພາະ​ພວກ​ເຂົາ​ "ຢາກ​ກໍ່​ອາຊະຍາກຳ​ທີ່​ສາມາດ​ເຮັດໃຫ້ຄົນ​ໝົດໂລກຕື່ນຕະລຶງ".

ໃນ​ຕອນທຳອິດ​ ຜົນ​ການ​ຕັດ​ສິນ​ອອກ​ມາ​ວ່າ​ແມນ​ສັນ​ຕ້ອງ​ຮັບ​ໂທດ​ປະຫານ​ຊີວິດ​ ແຕ່​ຫາກໍ່​ມີ​ການ​ຍົ​ກເລີກ​ໂທດ​ປະຫານ​ຊີວິດ​ໄດ້​ບໍ່​ດົນ​ ໂທດ​ຂອງແມນສັນ​ຈຶ່ງ​ປ່ຽນເປັນ​ການ​ຈຳ​ຄຸກ​ຕະຫຼອດ​ຊີວິດ​ ເຊິ່ງ​ຄຳ​ຂໍ​ອະໄພຍະ​ໂທດ​ທັງ​ໝົດ​ 12 ຄັ້ງ​ຂອງ​ແມນ​ສັນ​ຖືກ​ປະຕິເສດ.​ ແຕ່​ກໍ​ຍັງມີຍິງ​ສາວໄວ​ 26 ປີ​ທີ່​ຫຼົງ​ໄຫຼ​ແມນ​ສັນ​ ຍື່ນ​ເລື່ອງ​ຂໍ​ອະນຸຍາດ​ແຕ່ງ​ງານ​ກັບເຂົາ​ ເຖິງວ່າ​ຢູ່ໃນ​ຄຸກ​ມາ​ຕະຫຼອດ​ກໍ​ຕາມ.​ 

ເລື່ອງ​ລາວ​ຂອງ​ແມນ​ສັນ​ຖືກ​ນຳ​ໄປ​ຂຽນເປັນປຶ້ມອ່ານ,​ ສ້າງ​ເປັນຮູບເງົາ​ ແລະ ​ລະ​ຄອນ​ເວ​ທີ​ອີກຫຼວງຫຼາຍ ເຊິ່ງຫຼ້າສຸດໄປປະກົດໃນລະຄອນຊີຣີຊື່ດັງຂອງສະຫະລັດ American Horror Story : Cult. ​ພ້ອມກັນນັ້ນ ສະຖານ​ທີ່​ກ່ຽວ​ຂ້ອງ​ກັບແມນສັນ​ຍັງກາຍ​ເປັນ​ແຫຼ່ງ​ທ່ອງ​ທ່ຽວ​ ຈົນ​ລັດ​ທິ​​ສຸດ​ສະຫຍອງ​ຊັອກ​ໂລກ​ ຜົນ​ຜະລິດ​ຈາກ​ສັງຄົມ​ປ່ວຍ​ໄຂ້​ຂອງ​ອາ​ເມລິ​ກັນ​ຊົນ​ ປັດຈຸບັນ​ໄດ້​ກາຍ​ເປັນ​ "ປັອບ​ຄັນ​ເຈີ​" ໃນ​ທີ່ສຸດ.

ຂໍຂອບໃຈ
ຂໍ້ມູນ: muan.sanook

-----------------------------------
ລາວຮ໋ອດຮິດ See New. Hear New. Feel New.