'ເພດຍິງ' ສ່ຽງຕາຍຫຼາຍກວ່າເພດຊາຍ ຍອນເຫດຜົນນີ້

November 13, 2017

'ເພດຍິງ' ສ່ຽງຕາຍຫຼາຍກວ່າເພດຊາຍ ຍອນເຫດຜົນນີ້

ວິໄຈພົບເພດຍິງມີໂອກາດລອດຊີວິດຈາກຫົວໃຈຢຸດເຕັ້ນກະທັນຫັນຕ່ຳກວ່າເພດຊາຍ ເຫດຄົນພົບເຫັນເຫດການບໍ່ກ້າຊ່ວຍປໍ້າຫົວໃຈ ເພາະລັງເລສຳຜັດໜ້າເອິກສະຕີ ທັງຍັງຢ້ານເຮັດໃຫ້ຜູ້ຍິງເຈັບ.

ສຳນັກຂ່າວເອພີລາຍງານວ່າ ນັກວິໄຈໃນສະຫະລັດພົບວ່າ ຜູ້ຍິງທີ່ໄດ້ຮັບການປໍ້າຫົວໃຈ ຫຼື ຊີພີອາ (CPR) ເມື່ອມີອາການຫົວໃຈຢຸດເຮັດວຽກໃນທີ່ສາທາລະນະ ມີພຽງແຕ່ 39% ຂະນະຜູ້ຊາຍມີສັດສ່ວນ 45% ແລະ ຜູ້ຊາຍມີໂອກາດສູງກວ່າຜູ້ຍິງ 23% ທີ່ຈະລອດຊີວິດດ້ວຍວິທີຊ່ວຍເຫຼືອນີ້.

ອໍເດຣ ບລູເວີ ນັກວິໄຈຂອງມະຫາວິທະຍາໄລເພນຊິນເວເນຍ ຫົວໜ້າທີມວິໄຈ ບອກກັບກອງປະຊຸມສະມາຄົມພະຍາດຫົວໃຈອາເມລິກາ ທີ່ເມືອງອານາໄຮ ລັດດແຄລິຟໍເນຍ ເມື່ອວັນອາທິດວ່າ ຜູ້ຄົນທົ່ວໄປຄິດກັນວ່າ ການວາງມືລົງກາງໜ້າເອິກຂອງຜູ້ຍິງ ກົດສະຫຼັບ-ຜ່ອນຢ່າງແຮງ ແລະ ໄວ ເປັນເລື່ອງຍາກ ບາງຄົນຢ້ານວ່າຈະເຮັດໃຫ້ຜູ້ຍິງເຈັບ.

ຜົນງານວິໄຈນີ້ ເຊິ່ງຕີພິມໃນວາລະສານ American College of Cardiology ເກັບຂໍ້ມູນຕົວຢ່າງເກືອບ 20,000 ກໍລະນີທົ່ວສະຫະລັດອາເມລິກາ ນັບເປັນເທື່ອທຳອິດທີ່ສຶກສາວ່າ ຊາຍກັບຍິງໄດ້ຮັບການຊ່ວຍເຫຼືອໂດຍວິທີຊີພີອາ ແຕກຕ່າງກັນຢ່າງໃດ ແລະເຈົ້າໜ້າທີ່ກູ້ຊີບປະຕິບັດຕ່າງກັນແນວໃດລະຫວ່າງຜູ້ປ່ວຍຊາຍກັບຜູ້ປ່ວຍຍິງ.

ທ່ານໝໍ ເບນຈາມິນ ເອເບລາ ຈາກສະຖາບັນດຽວກັນ ບອກວ່າ ເຈົ້າໜ້າທີ່ກູ້ຊີບບາງສ່ວນບໍ່ສະດວກໃຈທີ່ຈະແກ້ເສື້ອຜ້າຂອງຜູ້ປ່ວຍຍິງ ຫຼື ສຳຜັດຖືກໜ້າເອິກຂອງຜູ້ປ່ວຍຍິງ ແຕ່ຕາມທິດສະດີແລ້ວ ທັງສອງຢ່າງນີ້ບໍ່ຈຳເປັນເລີຍ ຜູ້ຊ່ວຍເຫຼືອພຽງແຕ່ສຳຜັດທີ່ກະດູກສັນເອິກ ເຊິ່ງຢູ່ກາງລະຫວ່າງເຕົ້ານົມ.

ພາວະຫົວໃຈຢຸດກະທັນຫັນເກີດຈາກບັນຫາຈັງຫວະການເຕັ້ນ ແຕ່ລະປີຍິງອາເມລິກາທີ່ປະສົບພາວະເຊັ່ນນີ້ນອກອານາບໍລິເວນໂຮງໝໍມີກວ່າ 350,000 ຄົນ ປະມານ 90% ຂອງຈຳນວນນີ້ເສຍຊີວິດ ແຕ່ຊີພີອາສາມາດເພີ່ມອັດຕາການລອດໄດ້ 2-3 ເທົ່າຕົວ.

“ໃນສະຖານະການສຸກເສີນ ບໍ່ແມ່ນເວລາທີ່ຈະມາເຂີນອາຍ” ທ່ານໝໍອາເບລາກ່າວ.

ງານວິໄຈແນະນຳວ່າ ການຝຶກອົບຮົມວິທີເຮັດຊີພີອາອາດຕ້ອງປັບປ່ຽນ ທີ່ຜ່ານມາເນື້ອຫາລຳອຽງໄປທາງເພດຊາຍ ກະທັ້ງຫຸ່ນສຳລັບຝຶກປໍ້າຫົວໃຈຍັງເປັນຫຸ່ນຂອງຜູ້ຊາຍເລີຍ.