ຜູ້ນຳ ພັກ-ລັດ ວາງພວງມາລາ ວັນຊາດ ທີ 2 ທັນວາ ຄົບຮອບ 42 ປີ

ໃນຕອນເຊົ້າວັນທີ 1 ທັນວາ 2017 ບັນດາ​ການ​ນຳ​ພັກ-ລັດ, ເຊິ່ງນຳ​ໂດຍ​ ສະຫາຍ ບຸນ​ຍັງ ວໍລະ​ຈິດ ​ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ, ປະ​ທານ​ປະ​ເທດ ​ແຫ່ງ ສປປ ລາວ, ພ້ອມຄະນະ ປະກອບມີ ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ, ​ທ່ານ​ ແສງນວນ ໄຊຍະລາດ ຮອງປະທານ​ສະພາ​ແຫ່ງ​ຊາດ, ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ທ່ານ ພົທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານ ພົຕ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ແລະ ທ່ານ ສິນລະວົງ ຄຸດໄພທູນ ເຈົ້າຄອງ ນະຄອນຫຼວງ ວຽງຈັນ.

ໄດ້ຮ່ວມວາງພວງມາລາ ຢູ່ທີ່ອະນຸສາວະລີນັກຮົບນິລະນາມ, ເນື່ອງໃນໂອກາດ ສະ​ເຫຼີມສະຫຼອງວັນຊາ​ດ ທີ 2 ທັນວາ ຄົບຮອບ 42 ປີ (2/12/1975 – 2/12/2017) ເພື່ອສະແດງຄວາມຮູ້ບຸນຄຸນ ແລະ ລະນຶກເຖິງຄຸນງາມຄວາມດີ ຂອງນັກຮົບປະຕິວັດ ທີ່ໄດ້ເສຍສະຫຼະຊີວິດເລືອດເນື້ອເພື່ອຊາດ ຈົນ​ສາມາດ​ປົດ​ປ່ອຍປະ​ເທດ​ຊາດໄດ້​ຢ່າງ​ສົມບູນ ​ ​ແລະ ສະຖາ​ປະນາ ເປັນ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ດັ່ງ​ເທົ່າ​ທຸກ​ວັນ​ນີ້.

ຈາກນັ້ນ, ສະຫາຍ ບຸນ​ຍັງ ວໍລະ​ຈິດ ພ້ອມຄະນະ ໄດ້ເດີນທາງໄປຍັງທີ່ຫໍພິພິທະພັນ ໄກສອນ ​ພົມວິຫານ ເພື່ອວາງກະຕ່າດອກໄມ້ຕໍ່ໜ້າຮູບຫຼໍ່ ຂອງປະທານໄກສອນ ພົມວິຫານ ອະດີດຜູ້ນຳທີ່ແສນເຄົາ ລົບຮັກຂອງປວງຊົນລາວທັງຊາດ ເພື່ອສະແດງຄວາມກະຕັນຍູຮູ້ບຸນຄຸນ ທີ່ໄດ້ສຸມສະຕິປັນຍາເຂົ້າ ໃນການນຳພາຂະບວນການຕໍ່ສູ້ຕ້ານການຮຸກຮານ ຂອງພວກຕ່າງດ້າວ ສາມາດຍາດໄດ້ໄຊຊະນະນຳເອົາຄວາມຢູ່ເຢັນເປັນສຸກ ມາສູ່ປະຊາຊົນ ລາວບັນດາເຜົ່າ, ຊຶ່ງຜົນງາມ ແລະ  ຄຸນງາມຄວາມດີຂອງທ່ານ ແມ່ນໄດ້ຈາລຶກໃນຄວາມຊົງຈຳຂອງປະຊາຊົນລາວບັນດາເຜົ່າຕະຫຼອດກາລະນານ.

ທີ່ມາ: ຂ່າວສານປະເທດລາວ. ຂ່າວ: ວິ​ໄລ​ສັກ ພາບ: ເກດ

-----------------------------------
ລາວຮ໋ອດຮິດ See New. Hear New. Feel New.