ບໍລິສັດ ພອນສັກ ໄດ້ຮັບອະນຸຍາດຂຸດຄົ້ນບໍຄຳ ແລະ ປຸງແຕ່ງແຮ່ຄຳ ທີ່ເມືອງຄຳເກີດແລ້ວ

ລັດຖະບານ ແຫ່ງ ​ສປປ ລາວ ອະນຸຍາດ​ໃຫ້​ກຸ່ມບໍລິສັດ ພອນສັກ ຈຳກັດ ແລະ ບໍລິສັດ ບໍ່​ຄຳ ຄຳ​ເກີດ-ແສນ​ອຸດົມ​ຈຳກັດ ຂຸດຄົ້ນ ແລະ ປຸງ​ແຕ່ງ​ແຮ່​ຄຳ​ໃນ​ເນື້ອທີ່ 53 ຕາ​ກິໂລແມັດ ແລະ ເນື້ອທີ່ສຳ​ປະທານ​ຊອກ​ຄົ້ນ-ສຳ​ຫຼວດ ຈຳນວນ 1.749 ຕາ​ກິໂລແມັດ ຢູ່ເມືອງ​ຄຳ​ເກີດ ແຂວງ​ບໍ​ລິ​ຄຳ​ໄຊ ໂດຍ​ມີ​ໄລຍະ​ສຳ​ປະທານ 50 ປີ.

ການຈັດຕັ້ງ​ປະຕິບັດ​ໂຄງການ​ດັ່ງກ່າວ​ ລັດຖະບານ​ຈະ​ໄດ້ຮັບ​ຜົນ​ປະໂຫຍດ​ຫຼາຍ​ດ້ານ ໂດຍສະເພາະ ລາຍ​ຮັບ​ດ້ານ​ພາສີ-ອາກອນ ຄ່າ​ຊັບພະຍາກອນ ຄ່າ​ສຳປະທານ​ເນື້ອທີ່​ດິນ ນອກ​ນີ້ຍັງ​ຈະໄດ້​ຮັບ​ທຶນ​ພັດທະນາ​ດ້ານ​ຕ່າງໆຕື່ມ​ອີກ.

ພິທີ​ລົງ​ນາມ​ສັນຍາ​ສຳ​ປະທານ​ໂຄງການ​ດັ່ງກ່າວ ​ໄດ້​ຈັດ​ຂຶ້ນວັນ​ທີ 7 ທັນວາ 2017 ຜ່ານ​ມາ ຢູ່​ກະຊວງ​ແຜນການ ແລະ ການລົງທຶນ ເຊິ່ງ​ຕາງໜ້າ​ໃຫ້​ລັດ​ຖະບານ​ລົງ​ນາມ ໂດຍ​ທ່ານ ສຸພັນ ແກ້ວ​ມີ​ໄຊ ລັດຖະມົນຕີ​ກະຊວງແຜນການ ແລະ ການ​ລົງທຶນ ແລະ ທ່ານ ພອນ​ສັກ ວິໄລ​ສັກ ປະທານ​ກຸ່ມ​ບໍລິສັດ ພອນ​ສັກ ຈຳກັດ ທັງ​ເປັນ​ປະທານບໍລິສັດ ບໍ່ຄຳ ຄຳ​ເກີດ-ແສນ​ອຸດົມ ຈຳກັດ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ​ພ້ອມດ້ວຍ​ບັນດາ​ລັດຖະມົນຕີ ແຂກຖືກ​ເຊີນ​ທັງ​ສູນ​ກາງ ແລະ ທ້ອງຖິ່ນ​ເຂົ້າ​ຮ່ວມ.

-----------------------------------
ລາວຮ໋ອດຮິດ See New. Hear New. Feel New.